Opara se oprostio od doktora Tukića: 'Šjor Ante je partija i nije dočeka funtanu na staro misto'
Oglasio se na Facebooku
Bivši splitski gradonačelnik Andro Krstulović Opara biranim riječima se oprostio od doktora Ante Tukića koji je pokopan jučer na Lovrincu.
'Partija je šjor Ante Tukić.
Otkad san bija mulac, jema san veliko poštovanje prema njemu jer san živija u kući od mojih dide i bake odma do Tukićeve.
On je ličija moga didu i puno su se volili a ja san mora stat kuco i bit dobar.
Kad bi učinija koji monadu u susidstvu on bi se 'ka jidija' i nazva bi me koji put mali Krstulović ili kukumaru mali.
Kad smo jedan put moja klapa i ja u naš vrtal učinili neku veliku feštu bija se puno najidija jer smo bučili pa se ita prema nama sa pomidorama koje san mu sutradan donija nazad u maštil da moredu učinit šalšu. Moj dida to nije zna jer bi me bija šalamaštra a šjor Ante je krepava od smija na tu moju uncutastu batudu i nije mi zamirija.
Poslin puno godin smo se opet našli u prijateljstvu i u istome cilju.
Tili smo funtanu vratit di je i bila.
Obeća san mu to još ka momak.
Virova mi je ali nije virova da će nan to dopustit. A ja san kontra svih njih činija šta san moga.
Protiv su bili mnogi a najviše su ga razočarali 'njegovi' koji su mu govorili svašta kontra mene i koji su ga uvjeravali da će to oni učinit kad dodju na vlast. Ne da nisu ništa učinili nego su zatvorili i Muzej vode kojega san otvorija zajedno za Tomon Šuton, tadašnjin mojin direktoron VIK-a u maloj zgradi Vodovoda kod 'Basilicas Pictas' - na autentičnome mistu.
Šjor Ante je partija i nije dočeka funtanu na staro misto.
A ja mislin da smo je dužni vratit ne samo jer je vridna i šta je onod svo ovo vrime jedna buža i arija pa nan urbanistički fali nego je moramo vratit i radi ljudi ka šta je šjor Ante, koji su je tili nazad samo radi jubavi prema lipoti njiovoga Splita.
Fala Van šjor Ante i Bog Van da pokoj', poručio je.
